San Luisen 100.000 semeei buruzko ikerketa bat gurean

2012/09/25

André Lebourleux iparraldeko ikerlariak 2006.ean Dualpha argitaletxeak kaleratu zuen eta dagoeneko agortua dagoen lana gure webean eskaintzeko aukera eman digu. Artxibo digitaleko "Azterketak" saila aberastuko duen ikerketa eskura duzue zaletu guztiek

Hirurteko liberalaren amaiera suposatu zuen, 1823.ean Angulemako dukea buru zuen armada frantsesaren inbasioak.

San Luisen 100.000 semeak Bidasoa zeharkatzen. Irudiaren iturria

André Lebourleux historigileak, Frantzia eta Espainiako iturriak erabiliz, Espainiar liberalismoa boteretik kanpo utzi zuen inbasio frantsesa sakonki aztertu du bere La croisade des cent mille fils de Saint Louis lanean.

Donostia berriro ere setiatua 1823.go apirilean. Irudiaren iturria

Bere ikerlana hiru zatitan banatu dugu. Lehena La expedición francesa de 1823 a España o la cruzada de los cien mil hijos de San Luis, bere kasa itzuli du egileak gaztelerara. Bertan inbasioaren arrazoiak aztertuz gainera, borrokatuko duten bi armadak aurkezten dizkigu.

Fray Antonio Marañón "Trapensea", liberalen aurkako gerrilaren buruzagietako bat. Iturria

Bigarrenean inbasioa bera eta ondorio nagusiak aztertzen ditu. Lanaren zati hau frantsesez jarriko dugu gure webean.

Hirugarren zatiak, berriz, armada frantziar honen historia egiteko Espainiar artxiboen aberastasuna adierazten du. Orain arte ezezagunak diren funts dokumentalen deskribapena egiten digu, bereziki Archivo Histórico Nacionalaren bildumetan gordetzen direnena.

Angulemaren armada Orreagan. Iturria

Eskarmentu zabaleko historigilea dugu Ziburun bizi den Lebourleux. Genealogiako lanak egiten zaildua, azken urteetan Baionako eta, oro har, Euskal Herriari buruzko historia jorratu du gehienbat.

Gure eskerrik beroenak André Lebourleux jaunari bere jakinduria gure jarraitzaileen eskura adeitasunez jartzeagatik.