"Pour Don Carlos" filmaren emanaldia.

Film emanaldia

"Pour Don Carlos" (1921) filma, Espainian La capitana Alegria izenburuarekin estreinatua, da karlistaldien gaia lehen aldiz jorratu zuena. Pierre Benoit idazlearen izen bereko eleberrian oinarritua, Jeanne Roques aktore ezagunak, Musidora bezala ezagutuak, zuzendu, ekoiztu eta protagonista bezala antzeztu zuen. Musidora frantziar zinemaren hasierako izar nagusienetakoa izan zen. Mugimendu surrealistaren musa 1915.ean Les Vampires izenburuko film serie arrakastatsuaren protagonista izan zenetik.

Filmaren fotograma. Baionako Euskal Museoa.

Jaime de Lasuen karlista sutsuaren laguntza jaso zuen filma burutzerakoan eta horrek asko lagundu zion zuzen girotzeko. 1920.ean errodatu zen, gehiena Gipuzkoan, Hondarribia, Oiartzun, Irun, baina baita Elizondo eta Biarritzen.

Hondarribiko Guadalupeko ermita aurrean jasotako filmaren fotograma. Baionako Euskal Museoa.

Euskal Herrian errodatutako lehen film komertziala izan zen. Pour Don Carlos filma Erresuma Batuan, Estatu Batuetan, Alemanian, Egipton edo Sirian estreinatu zen. La capitana Alegría Madrilen 1921ko abenduak 16an estreinatu zen, beraz, proiekzioa filmari omenaldi bat da bere mendeurrenean.

Filmaren fotograma. Baionako Euskal Museoa.

Zinema mutuaren melodrama erromantiko bat da, guretzat bereziki interesgarria, girotzen duen garaitik gertu zegoelako eta, aldi berean,  1920.go Euskal Herriaren dokumentu antropologiko paregabea delako.

Filmaren fotograma. Baionako Euskal Museoa.

Filma galdutzat emana zen baina Toulouseko zinematekak kopia bat aurkitu eta, besteak beste, CNC, Euskal Filmategia eta Lizarrako Karlismoaren Museoaren laguntzarekin zaharberritu du. Filmaren zaharberritzearen arduradun den Toulouseko zinematekatik diote pelikulari lehenengo hamar minutuak falta zaizkiola, alegia, testuingurua adierazten duen sarrera galdu dela.

Hondarribiko harresietan jasotako filmaren fotograma. Baionako Euskal Museoa.

Bere estreinalditik ehun urte bete diren honetan, aukera paregabea duzue Ormaiztegin filma eder hau ikusteko. Aurrez izen ematea gomendatzen dugu, kopuru mugatua.

Kontaktua: Telefonoa, 943 88 99 00 // e-posta, mzumalakarregi@gipuzkoa.eus

Erakusketa

"Por Don Carlos" proiektuaren inguruan aldi baterako erakusketa antolatu dugu Zumalakarregi Museoan. Berau burutzeko hainbat erakunderen laguntza izan dugu, bereziki, Lizarrako Karlismoaren Museoa eta Baionako Euskal Museoarena.

beste JARDUERA OSAGARRIAK:

TERTULIA

· urtarrilak 13an, Karlismoa eta Zinema izango da gaia eta gazteleraz garatuko da. Honetaz solasteko Jose Mari eta Eneko Tuduri adituak izango dira gurekin.

FILM EMANALDIA

· otsailaren 18an, "Napardeath" karlistaldian girotutako azken filma ikusteko aukera egongo da. "Ataun of the Dead" filmarekin hasitako trilogiari amaiera eman zion laburmetraia, historiara gerturatzeko beste modu baten eredu dugu, satirarena. Katihotsak Logia, Zumalakarregi berpiztu digun talde honen hainbat partaide izango ditugu gurekin, proiektu honen ezaugarriak aztertu eta gerturatzen direnekin bere esperientzia partekatzeko.

TERTULIA

· martxoaren 2an, Xabier Erkizia artistarekin solasaldia izango dugu Zumalakarregi Museoan. "Zinema ez zen sekula mutua izan" izenburua jarri dio ekitaldiari.

Anima zaitezte Zumalakarregi Museoan ekimen hauetan parte hartzera. Aurrez izen ematea gomendatzen dugu, parte hartzaile kopuru mugatua. Izen ematea posta elektronikoz eta telefonora deituz egin daiteke:

mzumalakarregi@gipuzkoa.eus

943 88 99 00 / 659 43 45 66

*Pour Don Carlos (1920), Musidora eta Jacques Lasseyne-ren, La Cinémathèque de Toulousek zaharberritua izan da CNCren babesarekin.