"Txapela… Noiztik?" aldi baterako erakusketa zabaltzear Zumalakarregi Museoan.

2018/06/14
"Txapela… Noiztik?" aldi baterako erakusketa datorren ekainak 22an zabalduko da Zumalakarregi Museoan. Inaugurazioa arratsaldeko 18:30'tan ospatuko dugu. Gordailua, Gipuzkoako Ondare Bildumen Zentroarekin lankidetzan eta Boinas Elósegui enpresaren partaidetza bereziarekin, erakusketa honek, euskaldunen artean txapelaren erabileraren historia kontatuko du irudien, testuen eta XIX. mendeko pieza originalen bitartez.

Arestian gune honetan bertan izan zenuten  "Nik ere txapela maite dut. Boinas Elosegi 1858-2018" Tolosan zabaldutako erakusketaren berri. Ildo berean Zumalakarregi Museoak, Gordailua, Gipuzkoako Ondare Bildumen Zentroarekin lankidetzan, antolatu du aldi baterako erakusketa hau.

 

Charles Frederick HENNINGSEN. "Carlist infantry officer". 1834. ZM.

Izan ere, nahiz eta askok txapela euskaldunei betidanik lotutako elementua izan zela pentsatu, benetan gure artean erabilera XIX. mendean zabaldu zen eta karlistadak oso paper garrantzitsua jokatu zuten horretan. Karlistek bereziki, baina baita euskal boluntario liberalek ere, txapela hautatu zuten beraien uniformeak osatzeko.

 

"Prudencio Arnao mikeletearen erretratua". c.1875. Gordailua.

Txapela fabrikaren 160. urteurrenak euskaldunen artean buruko honen erabilera noiz zabaldu zen aztertzeko aukera eskaini digu.  XIX. mendean sortu zuen Antonio Elosegik txapela fabrika eta Tomas Zumalakarregiren eragina nabarmena izan zen bere erabilera zabaltzerakoan.


Adolphe BAYOT. "Zumalacarreguy". c. 1850. Bilduma pribatua.

Erakusketak euskaldunen artean txapelaren erabilera zabaldu zeneko fenomenoa aztertzeaz gain,  “La Casualidad. Boinas Elosegui” txapel fabrikaren XIX. mendeko bilakaera ere adieraziko du, Tolosako enpresaren parte hartzeari eskerrak.

 

La Casualidad.Fábrica de boinas de D. Antonio Elosegui. Sinadura liburua. Tolosa, 1899. Boinas Elósegui bilduma.

Zatozte eta ezagutu ezazue euskaldunen sinbolo bihurtua den buruko honen zabalkundea.

"Txapela… Noiztik?" aldi baterako erakusketa zabaltzear Zumalakarregi Museoan.

ANTEQUERA AZPIRI. “A los nietos de Antonio Elósegui”. Donostia, 1930. Boinas Elósegui bilduma.